नेपाली काँग्रेसका सभापति गगनकुमार थापा शनिबार ‘ससुराली जिल्ला’ नुवाकोट गएका थिए ।
पार्टी संगठन सुदृढीकरणका लागि पार्टीगत भ्रमणका क्रममा नुवाकोटको बेलकोटगढी पुगेका थापा रमाइलो मुडमा प्रस्तुत भए ।
थापालाई स्वागत गर्न काँग्रेस नुवाकोटका पूर्वसभापति एवं संविधानसभा सदस्य जगदिश्वर नरसिंह केसी कार्यकर्तासहित बेलकोटगढी–२ कुमरीस्थित काँग्रेस वडा कार्यालय परिसरमा उपस्थित थिए ।
केसीलाई भेटेलगत्तै थापाले भने, ‘हामी बाटामा आउँदा एउटा कुरा भयो, नुवाकोटको छोरी राम्रो, बाटो नराम्रो ।’
गगनको कुराले स्वयं केसी पनि हाँस्छन् । उनले अर्कै बाटोतर्फ इशारा गरेर त्यो राम्रो भएको देखाउँछन् । केसी भन्छन्, ‘हजुरहरु यो बाटो आइस्यो, यो बाटो ठीक थियो नि त ।’ कार्यकर्ताले भने खुसी हुँदै ‘ठीक दिनुभयो दाई’ ले भनेको सुनिन्छ ।
थापा काँग्रेस नेता अर्जुननरसिंह केसीका छोरी ज्वाईं हुन् ।
केसी पुत्री डा. अञ्जना केसीसँग गगनको ०६५ वैशाखमा विवाह भएको हो ।
थापाले ठट्टा गर्दा उपस्थित काँग्रेस कार्यकर्ताले हाँसोको फोहोरा छाडेका थिए ।
थापाले ‘नुवाकोटको छोरी राम्रो बाटो नराम्रो’ भनेको भिडियो सामाजिक सञ्जालमा भाइरल भएको छ ।
कतिपयले बाटो नराम्रो भन्ने थापाको अभिव्यक्तिले पञ्चातकालदेखि हालसम्म सत्ता र शक्तिमा रहेका ससुरा केसीप्रति व्यंग्य गरेको रुपमा व्याख्या गरेका छन् ।
पञ्चायतमै राष्ट्रिय पञ्चायतका सदस्य र जिल्ला विकास समिति, नुवाकोटको सभापति भएका केसीले बहुदलीय व्यवस्था स्थापनापछि शिक्षा, स्वास्थ्य, भौतिक योजना, सहरीविकास जस्ता मन्त्रालय सम्हालेका थिए ।
