काठमाडौँ । प्रतिनिधिसभामा जारी गतिरोध अन्त्य गर्ने प्रयासस्वरूप सभामुख देवराज घिमिरेले प्रमुख राजनीतिक दलका मुख्य सचेतकहरूसँग छलफल सुरु गरेका छन् । सभामुख घिमिरेको सिंहदरबारस्थित कार्यकक्षमा भइरहेको छलफलमा संसद्को अवरोध खुलाउने र आगामी आर्थिक वर्षको बजेटमाथिको छलफलका लागि नयाँ कार्यतालिका (क्यालेन्डर) बनाउने विषयमा केन्द्रित रहेको बताइएको छ।

राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) ले गृहमन्त्री रमेश लेखकको राजीनामा र भिजिट भिसा प्रकरणमा छानबिन समिति गठन गर्नुपर्ने मागसहित प्रतिनिधिसभा अवरोध गर्दै आएका छन्। उक्त गतिरोधलाई अन्त्य गरी सदनको कार्य अघि बढाउनका लागि सभामुखले पहल गरेका हुन् ।